ઉકરડો બની ગયેલા મુંબઇના મરીન બીચને આ વ્યક્તિએ બનાવ્યો ઝકાસ, ગુંડાઓ દ્વારા મળી ધમકી પણ નહોતી માની હાર

નમસ્કાર મિત્રો, તમારા બધાનું અમારા લેખમાં એકવાર ફરી સ્વાગત છે. આજે આપણે સ્વછતા સાથે જોડાયેલી થોડી વાતો કરીશું, અને તમને એક રિયલ લાઈફ હીરો વિષે જણાવીશું, જેણે સ્વછતાને પોતાની ફરજ સમજીને એક મોટું કામ કરી દેખાડ્યું છે. મિત્રો સ્વછતાની બાબતમાં આપણો દેશ ઘણો પાછળ છે. સરકાર દ્વારા સ્વચ્છ ભારત અભિયાન ચલાવવામાં આવતું હોવા છતાંપણ, આજે લોકો ગંદકી કરતા અચકાતા નથી. લોકો જ્યાં ત્યાં કચરો ફેંકી દે છે, પાન મસાલા વગેરે ખાઈને જ્યાં ત્યાં થૂંકી દે છે અને સ્વછતાનું જરા પણ ધ્યાન નથી રાખતા.

ઘણા વર્ષોથી સરકાર દ્વારા, સેલિબ્રિટીઓ દ્વારા, ક્રિકેટરો દ્વારા લોકોને સ્વછતા જાળવવા માટે કહેવામાં આવી રહ્યું છે, છતાં પણ ઘણા લોકો એવા છે જે એ બધી વાતો પર ધ્યાન નથી આપતા, અને ગંદકી ફેલાવતા જ રહે છે. પણ આજે અમે તમને એક હીરો વિષે જણાવવા જઈ રહ્યા છીએ, જેણે મુંબઈના વર્સોવા બીચને સ્વચ્છ કરીને લોકો માટે એક ઉત્તમ ઉદાહરણ પૂરું પાડ્યું છે. અને આ હીરો કોઈ ફિલ્મના હીરો નથી પણ એક રિયલ લાઈફ હીરો છે. અમે જે વ્યક્તિની વાત કરી રહ્યા છીએ એમનું નામ છે અફરોઝ શાહ. તે મુંબઈના રહેવાશી છે અને વ્યવસાયે વકીલ છે.

એકલાએ શરુ કરી સફાઈ, પછી બની ગયું અભિયાન :

એમણે મુંબઈમાં આવેલા વર્સોવા બીચને કચરાથી ભરેલું જોઈને એ નિર્ણય લીધો કે, તે આ દરિયા કિનારાને સાફ કરીને જ રહેશે. અને એમણે વર્ષ 2015 માં એની સફાઈ કરવાની શરુ કરી. પછી એમને આ કામ કરતા જોઈને ધીરે ધીરે અન્ય લોકો એમની સાથે જોડાતા ગયા અને એમની એક ટીમ બની. પછી તો એમાં વધુ ને વધુ લોકો જોડાતા ગયા અને એક અભિયાન બની ગયું.

લોકો આ અભિયાનમાં જોડાતા ગયા અને સફાઈ કરતા ગયા. સફાઈ કામ દરમ્યાન બોલીવુડના દિગ્ગજ કલાકાર અમિતાભ બચ્ચને પણ અહીંની મુકલાત લીધી હતી, અને અહીંયા આવીને સફાઈ કરી હતી, તેમજ અફરોઝ સાથે વાતચીત કરીને એમને આ સારૂ કામ કરવા માટે અભિનંદન પણ આપ્યા હતા.

ગુંડાઓ દ્વારા મળી હતી ધમકી :

એમના માટે આ કામ કરવું સહેલું ન હતું. કારણ કે વર્સોવા બીચની સફાઈ કરતા દરમ્યાન એમને આ કામ રોકવા માટે ગુંડાઓ દ્વારા ધમકી આપવામાં આવી હતી. તેમજ આ કામમાં જોડાયેલા લોકોને પણ ગુંડાઓ દ્વારા ધમકીઓ અને ગાળો આપવામાં આવી રહી હતી. ત્યારબાદ અફરોઝે આ વાત પોતાના ટ્વીટર એકાઉન્ટ પર ટ્વીટ કરીને શેયર કરી હતી.

અને એ પછી ત્યાંના મુખ્યમંત્રી દેવેન્દ્ર ફડણવીસે અફરોઝ સાથે મુલાકાત કરી અને એમને સુરક્ષાનું આશ્વાસન આપ્યું. તેમણે કહ્યું કે તમે કોઈ પણ જાતની ચિંતા કર્યા વગર આ કામ શરુ રાખો, તમારા બધાની સુરક્ષાની જવાબદારી અમારી છે. તમને કોઈ કાંઈ પણ કરી શકશે નહિ. અને એમણે આ કામ શરુ રાખ્યું અને એમની મહેનત રંગ લાવી. અને કચરાથી ભરેલો દરિયા કિનારો એક સ્વચ્છ દરિયા કિનારો બની ગયો.

PM એ કરી પ્રશંસા :

PMએ પોતાના માસિક રેડિયો કાર્યક્રમ ‘મન કી બાત’ માં પર્યાવરણ પ્રેમી અફરોઝ શાહના કામની પ્રશંસા કરી હતી. પીએમએ કહ્યું હતું કે, હું મુંબઈના વર્સોવા બીચને સાફ કરવા પ્રયત્ન કરનાર અફરોઝ શાહ અને એમની આખી ટીમને અભિનંદન પાઠવું છું.

‘ચેમ્પિયન ઓફ ધ અર્થ’ નો પુરસ્કાર મળ્યો :

અફરોઝ વ્યવસાયે હાઈકોર્ટના વકીલ છે. અને એમણે ઓક્ટોબર 2015 માં મુંબઈના વર્સોવા બીચને સાફ કરવાનું અભિયાન શરુ કર્યું હતું. અને વર્ષોની મહેનત પછી એમણે અને એમની ટીમે એક ગંદા દરિયા કિનારાને એક સ્વચ્છ દરિયા કિનારામાં ફેરવી નાખ્યો. એમના આ કામને જોઈ સંયુક્ત રાષ્ટ્રએ પર્યાવરણ કાર્યક્રમ અંતર્ગત એમને ‘ચેમ્પિયન ઓફ ધ અર્થ’ ના પુરસ્કારથી સમ્માનિત કર્યા છે. તે ખરેખર એક હીરો છે. અને હવે તે મિથી નદીને પણ સાફ કરવા માંગે છે. આશા રાખીએ કે એમનું આ કામ પણ પૂરું થાય.